CAGAYAN DE ORO CITY – Gitakdang e-biyahe padulong sa kauluhan ang gitratar sa kapolisan nga most wanted person nga kanhi sundalo nga unang nadakpan sa joint intelligence-driven operation sa Brgy Limonda,Opol,Misamis Oriental kagahapong adlawa.
Kini human nasilbi sa Police Regional Office 10’s Regional Intelligence Division ang court’s arrest warrant batok sa dinakpan nga si alyas Tinyente Preacher Jacob,51 anyos nga taga- Tagum City,Davao del Norte.
Gibutyag ni PRO 10 spokesperson Major Joann Navarro nga gisilbi sa RID 10 kuyog ang 2nd PMFC Misamis Oriental, 1001st Maneuver Company RMFB10, Opol Municipal Police Station, DI-MAPIO, ug PNP Anti-Kidnapping Group – Mindanao Field Unit (Iligan Satellite Office) ang arrest warrant subay sa sugo sa korte tungod sa kasong pagsupak sa Article 267 sa Revised Penal Code o Kidnapping for Ransom nga gilugwa sa RTC Branch 145 nga nakabase sa Makati City.
Si Jacob kinsa kanhi 2nd lieutenant sa Philippine Army ug graduwado sa Scout Ranger Course ang kabahin sa gitudlo nga akusado sa pagdagit sa biktima nga negosyante nga si Filipino-Pakistani Taric Mian nga unang nahitabo sa De la Rosa Street corner Santuico Street,Makati City niadtong Mayo 2007.
Hinoon,nabuhian ang kidnap victim apan sumala sa police record,nakabayad kini sa 2 milyones pesos nga ransom payoff bugti sa iyang kagawasan niadtong Hunyo 2007 diin ang tropa na sa PACERS ang naka-rekober kaniya.
Nadakpan sa gilusad nga follow up operations ang mga kauban ni Jacob nga gilangkuban sa duha ka sundalo,pulis ug laing tulo ka personalidad diin sa pagligid sa kaso gi-konbikto sa kasong kidnapping nga nasang-at sa RTC Branch 150 sa Makati City.
Sumala sa PNP,bugtong si Jacob ang naka-eskapo ug halos dul-an 20 ka tuig ang milabay ayha hingpit nadakpan sa PNP diin hilom nanimuyo sa Misamis Oriental.
Hinoon,walay gipakitang pagsukol ang akusado ug malinawon kini nga mikuyog sa mga otoridad human nasilbi ang kasuguan sa korte.
