CAGAYAN DE ORO CITY -Gisilotan sa duha ka ihap sa pagkabilanggo sa tibuok kinabuhi ang kanhi police officer nga nalambigit sa gidiling droga nga unang nadakpan sa PDEA-10 sulod sa motel ning syudad.
Kini human nakit-an ni RTC Branch 25 Presiding Judge Arthur Abudiente nga sad-an si retired SPO1 Reynaldo de la Victoria diin nakuhaan kini’g balor P200-mil nga shabu atol sa pagdakop kaniya.
Miingon si Abudiente nga unta kakuhaa’g leksyon sa uban ang gidangatan ni De la Victoria ug dili mosundog pagpayuhot sa droga.
Si De la Victoria ang kanhi konektado sa Cagayan de Oro City Police Office o COCPO ayha kini nasikop sa PDEA-10 Setyembre 2014.
Samtang gitratar sa PDEA-10 nga pagpakusog sa ilang moral ang pagkonbikto sa korte sa dinakpan nila nga kanhi pulis tungod sa pagpayuhot sa gidiling droga.
Kini human sila ang midakop pinaagi sa buy bust operation kang De la Victoria sulod sa motel sa syudad.
Miingon si PDEA agent Ben Calibre nga gikalipay nila ang hukom sa korte ug nanganti nga dugang high value targets o naa sa gobierno ang ilang sikopon kon dili mangundang pagbaligya’g gidiling droga.
Samtang gibaharan sa PNP-10 ang aktibong kapolisan ug umaabot pang mag-pulis nga dili lambigitan ang pagbaligya’g gidiling droga aron makalikay sa atubangon nga problema.
Gihimo ni PNP regional spokesperson Supt Lemuel Gonda tungod sa pagkonbikto ni Abudiente kang De la Victoria tungod sa kasong pagsupak sa pagbaligya’g droga.
Gikalipay nila ang hukom sa korte tungod kay wala nagkahulugan nga kon pulis o sundalo ang usa ka suspek,dili na madutlan sa ngipon sa balaod.
