Nabalaka karon ang Federation of Free Workers (FFW) human maapektuhan ang kapin 316 hangtod 600 ka mga mamumuo sa Philippine Sanjia Steel Corporation tungod sa padayong imbestigasyon ug posible nga pagpasira sa planta.
Matud ni Atty. Sonny Matula sa FFW, dako ang ilang kabalaka sa kahimtang sa mga trabahante, ilabi na nga daghang kompanya sa Luzon ang nagsira samtang naapektuhan usab ang usa ka manufacturing company sa Mindanao.
Tungod niini, nanawagan ang FFW kang DOLE Secretary Bienvenido Laguesma nga mangitag paagi aron mapasig-uli ang operasyon sa planta ug dili mawadan og panginabuhian ang mga empleyado.
Dugang pa ni Matula, administrative concern lamang ang mga isyu nga gilambigit sa labor standards, permits sa mga Chinese workers, ug kalidad sa steel products nga kinahanglan tubagon sa nagkalain-laing ahensya sama sa DOLE ug DTI.
Giingon usab niini nga importante ang steel manufacturing industry sa paglambo sa nasud, busa kinahanglan nga masiguro sa gobyerno dili lamang ang national security kondili apil usab ang job security sa mga mamumuo.
