CAGAYAN DE ORO CITY – Walo ka ihap sa syndicated estaffa ang gipasaka sa National Bureau of Investigation (NBI) National Capital Region batok KAPA founder Pastor Joel Apolinario ug laing 14 didto sa Department of Justice (DoJ), karong buntag.
Pinaagi sa gisang-at nga kaso, mahimong mupalugwa ang korte sa warrant of arrest batok kang Apolinario, kinsa padayong idlas sa mga kamot sa otoridad.
Kung mahinumduman nga sa bulan sa Hunyo, hugot nga gimando ni Presidente Rodrigo Duterte nga ipahunong na ang lapad nga operasyon sa Kabus Padatoon Ministry International, Inc., tungod kay tin-aw kining nakalapas sa balaod sa Securities and Exchange Commission (SEC).
Sa bulan sa Mayo, sunud-sunod nga gironda sa NBI ang mga KAPA offices Visayas ug Mindanao, human gipasaka sa SEC ang criminal case batok KAPA, hinungdan nga gimando ang warrantless arrest sa mga miyembro kung padayon silang magbobo sa ilang salapi sa gikonsiderar nga labing dakung investment scam sa Pilipinas.
Kuyog sa dakung kontrobersiya ang paglambigit sa mga mamumuo sa gobyerno nga gi-akusahang biggest investors sa KAPA, kundiin nadiskobrehan sa NBA ang special lanes ug counters para sa PNP, AFP ug DepEd, sulod sa ilang mga KAPA offices sa Mindanao.
