CAGAYAN DE ORO CITY, Philippines – Tumanon sa Presidential Anti-Organized Crime Commission (PAOCC) ang kamanduan ni Presidente Ferdinand Marcos Jr nga malimpyohan ang tibook Pilipinas sa tanan aktibida sa Philippine Offshore Gaming Operations (POGO).
Kini ang gisaad ni PAOCC spokesperson Winston Casio human anaa na sa dul-an 50% ang ilang nanbungkag nga POGO sugod 2023.
Lakip sa ilang nabungkag ang mga legal POGO nga giplihok ubos sa Business Process Outsourcing (BPO) nga segun sa mando ni Marcos.
Mahinumduman nga sa milabay’ng ikaduha nga state of the nation address (SONA) sa pangulo, iyang gimando nga pasirad-an ang tanan legal ug ilegal nga POGO, ug girantiya nga pangitaan sa laing alternatibong trabaho ang tanan trabahante nga maapektuhan sa iyang kamanduan niadtong Hulyo 22, 2024.
Sa pagkutlo ning balita wala pay documento nga permado ni Presidente Marcos o Executive Order nga magpamatuod sa pag-implementar ang total ban sa POGO..
