CAGAYAN DE ORO CITY – Nasignit sa City Drug Enforcement Unit sa Cagayan de Oro City Police Office (COCPO-CdeU) ang gitumbok nga duha ka high value targets (HVTs) sa gilusad nga anti-drug buy bust operation sa Sitio Kolambog,Barangay Lapasan ning syudad.
Giila ni COCPO City Director Col.Salvador Radam ang mga dinakpan nga sila Emil ug Jovel nga pulos legal ang edad ug nagpuyo sa maong lugar.
Subay sa imbentaryo nga gilusad sa CdeU team,nabawi gikan sa HVTs ang 1.5 kilos nga gitoohang shabu nga dunay kantidad nga halos siete milyones pesos.
Nabawi usab sa operasyon ang dul-an 20 ka lain-lain nga gindak-on sa sachets nga dunay sulod nga shabu kuyog ang P1-K nga market money ug caliber 380 revolver kuyog ang pipila ka mga bala.
Nasuta nga kanhi may rekord na ang duruha kay nadakpa na sa kapolisan sa susama nga kasupakan ning syudad sa miaging katuigan.
Mag-atubang sa kasong pagsupak sa Republict Act 9165 (Dangerous Drugs Act of 2002) ug illegal possession of firearms and ammunitions ang duruha sa piskalya ning syudad sa adlaw’ng Huwebes.
