GIBASURA sa International Criminal Court (ICC) ang hangyo sa kampo ni kanhi Presidente Rodrigo Duterte nga i-diskwalipikar ang tolo ka abogado sa mga biktima sa drug war.
Subay sa siyam pa pahina nga redacted version sa desisyon nga gipagawas, sa adlaw’ng Biyernes, Pebrero 20, namahayag ang chamber nga napakyas sa pagmugna sa lig-on nga argumento ang depensa aron pamatud-an nga dunay conflict of interest tali sa mga abogado nga sila Atty. Joel Butuyan ug Atty.
Gilbert Andres, ubos sa article 16 sa Rome Statute. Mahinumduman nga nangayo usab ang legal team sa kanhi president, niadtong Pebrero 11, sa Chamber nga sugoon ang ICC Registry sa pagsuspenso sa access nila Atty. Butuyan, Atty. Andres ug Atty. Nicolene Arciana sa rekord sa kaso samtang naghulat pa sa desisyon.
Lakip sa gihuptang basihan sa depensa ang giingong “impediment to representation” tungod sa conflict of interest, kay na-estbalishar nga adunay propesyunal nga relasyon sila Butuyan ug Andres kang Arciana, nga makahatag sa impresyon sa pagpabor sa mga biktima ug maka-apekto sa integridad sa umaabot nga paghusay.
