Gipalapdan sa Hapsay Sapa Movement ang ilang kampanya sa pagmentinar sa kalimpyo ug pagpanalipod sa kinaiyahan, isip kabahin sa pagsaulog sa Zero Waste Month niadtong bulan sa Enero.
Namahayag si Hapsay Sapa Coordinator Patrick Gabutina sa Bombo Radyo nga bisan pa man nga natapos na ang Zero Waste Month, padayon gihapon ang ilang paningkamot pinaagi sa pakigkoordinar ug pakig-partner sa mga tunghaan ug uban pang grupo sa syudad aron mas mapaabot sa katawhan ang kahinungdanon sa hustong paglabay ug pagdumala sa basura.
Sumala ni Gabutina, tungod kay lisod na kaayo usbon ang nabatasan sa pipila ka mga hamtong nga usahay pabaya sa basura, tuyo sa Hapsay Sapa Movement nga magsugod ang edukasyon sa kabatan-onan.
Matod pa niya, kon sa sayo pa nga edad masabtan na sa mga bata ang paghigugma sa kinaiyahan ug ang importansya sa limpyo ug hapsay nga palibot, mas dako ang tsansa nga mahimong responsable sila sa pagdumala sa basura sa umaabot. (James Oliver)
