Hugot nga beripikasyon ang ipatuman Department of Social Welfare and Development (DSWD) kuyog ang lokal mga ahensya sa pag-apod-apod sa ₱5,000 nga cash relief assistance alang sa mga motorela drivers ug operators. Target nga ipagawas ang ayuda sa ikaduhang semana sa Abril. Gibutyag ni City Information Officer Jade Adeser nga gitumong ang beripikasyon nga malikayan ang doble nga pagdawat ug masiguro nga angay lamang nga mga benepisyaryo ang makadawat sa maong ayuda. Gipasabot ni Adecer nga kinahanglan balido ang lisensya sa pagmaneho ug kompleto ang mga dokumento, kay dili dawaton ang expired nga papeles sa pag-claim. Hisayrang adunay 2,444 ka rehistradong motorela drivers ug operators sa syudad nga buot mahatagan sa ayuda kung kompleto sa mga rekisitos. Samtang padayon ang beripikasyon sa listahan, gilauman nga mahuman kini sa labing dali nga panahon aron matuman ang gitakdang iskedyul sa paghatag sa ayuda. Dugang pa ni Adeser, ipahibalo sa publiko ang tanang detalye pinaagi sa opisyal nga social media page sa syudad ug sa lokal nga media. (co-written by James Oliver)
