CAGAYAN DE ORO CITY, Philippines – Gikompirmar sa Israeli Defense Force nga napatay sa gilusad nga airstrike sa Beirut, Lebanon si Hezbollah Leader Hassan Nasralla.
Namahayag si IDF Spokesperson Rear Admiral Daniel Hagari nga kadaugan sa mga biktima sa Hezbollah ang pagkamatay ni Nasrallah kinsa giila nga ‘public enemy number one’ sa Israel.
Sulod sa tolo ka dekada, naila si Nasrallah isip senior religious ug military leader sa Lebanon nga kanunay unod sa iyang mensahe ang pagpulbos sa mga Hudyo ug Kristiano sa Israel.
Human sa anunsyo sa IDF, gisegundahan sa Hezbollah Headquarters ang kompirmasyon sa pagkamatay sa ilang 64 anyos nga leader.
Sa pagkutlo ning balita, gikompirmar usab sa United States Pentagon ang pagkamatay ni Nasrallah, apan nanghunaw sa ilang kalambigitan sa opensiba.
Lima ka adlaw nga pagbangutan ang gideklarar sa tibook Lebanon, alayon sa pagkamatay sa ilang political-religious ug senior military leader.
