CAGAYAN DE ORO CITY-Nagtoo ang Citizens Watch for Good Governance o CWGG Region 10 nga walay lig-ong grounds ang kasong impeachment nga gipasaka batok kang Pres. Rodrigo Duterte.
Matud ni CWGG Convenor Atty. Antonio Soriano nga dili mahimong ground sa impeachment ang giingong pagbaton ni Pres. Duterte sa tinagong bahandi niadtong mayor pa siya sa Davao City.
Dugang ni Atty. Soriano nga huyang usab nga ground ang giingong koneksiyon sa presidente sa gikabaniog nga Davao Death Squad o DDS.
Namahayag pa si Soriano nga klarong politically motivated ang nasampit nga reklamo kay ka-alyado ni Sen. Antonio Trillanes ang nagduso sa impeachment case nga si Magdalo Rep. Gary Alejano.
Samtang,nagdumili una sa paghatag ug komento si City Mayor Oscar Moreno sa posibleng sangputanan sa impeachment case batok kang Pres. Duterte.
Si Moreno miingon nga ‘premature’ pa kaayo aron hisgutan ang mahitabo sa kaso kay mo-agi pa kini sa ta-as nga proseso. Si Moreno miingon nga gikinahanglan pang sutaon kon anaa ang gitawag nga ‘sufficient in form and substance’ sa reklamo.
Si Moreno, kinsa kanhi kongresista sa Misamis Oriental ang nagsilbi usab kaniadto nga prosecutor sa impeachment trial batok kang kanhi Pres. Joseph Estrada.
Sa pikas bahin,gihagit sa pipila ka relihiyosong pundok nga unta gitumong sa ikaayo sa katawhan ang pagduso’g impeachment complaint batok Duterte sa kamarabaha.
Miingon si IFI Bishop Felixberto Calang nga trabaho sa mga kongresista ang pagpanday sa balaodnon ug dili ang pagwaldas sa salapi sa katawhan.
Si Calang miingon nga mas maayo nga mga programa nga nag-sentro paghaw-as sa kabus ang angay ka-bisihan ug dili ang pagpapalagpot sa mga opisyal nga nagtrabaho alang sa nasud.
