CAGAYAN DE ORO CITY-Gawasnon na ang inahan ug igsoon ni Claveria Mayor Mariluna Salvaleon Abrogar nga unang gikasuha’g kriminal sa CIDG-10 sa korte ning syudad.
Kini human sila makabayad sa pyansa nga tag 120-mil pesos matag-usa sa korte kagahapong adlawa.
Gibutyag ni Abrogar nga dungan nga nakagawas sa iyang inahan nga si Getrudes Salvaleon ug igsoon nga si Reagan Salvaleon ang magsoong Mario ug Christopher Pagara nga nakuhaa’g duha ka armas dihang gironda sa mga otoridad ang ilang pinuy-anan sa miaging adlaw.
Miingon si Abrogar nga balik na sa ilang ancestral house ang iyang inahan diin daghan nga mga tawo ang naghulat niini.
Samtang giangkon ni Abrogar nga nasakit siya sa gihimo sa Criminal Investigation and Detection Group -10 sa pagdakop sa iyang inahan ug igsoon dihang gisilbihan sa search warrant sa ilang pinuy-anan.
Gibutyag ni Mayor Abrogar nga daw gilangan-langan sila sa CIDG-10 busa nadugay sila pagpyansa aron makagawas ang iyang inahan ug igsoon sa presohan.
Dugtong sa maong mayor nga nabati nilang nahikawan sila sa hustisya sa gihimo sa mga pulis kanila.
