Susihon ni incoming Ombudsman Jesus Crispin Remulla ang kasong gikalambigitan ni Vice President Sara Duterte nga na-file sa Ombudsman.
Sa labing unang press conference sa acting Ombudsman, iyang gipaniguro nga tun-an ang mga kaso sa bise kalabot sa paggamit sa “confidential funds” sa panahon nga nagsilbi kining kalihim sa Department of Education ug sa paghawid sa sekretong pondo sa Office of the Vice President sa tuig 2022 hangtud 2023.
Hisayran nga si Remulla maoy gipili ni Presidente Ferdinand Marcos Jr gikan sa 6 ka mga shortlisted candidates nga gipasa sa Judicial and Bar Council (JBC).
Ang kalihim sa Department of Justice maoy mihulip sa nabakante nga posisyon ni Samuel Martires, kinsa nag-retiro na sa iyang pagserbisyo.
Hawiran ni Remulla ang iyang posisyon sulod sa pito ka tuig.
Mahulipan lamang si Remulla pinaagi sa impeachment.
Dugtong niini, gitinguha ni Remulla nga mas mahimong sihag ang trabaho sa Ombudsman ug ipasabot sa publiko ang ilang nag-unang tahas.
Gisaad sa opisyal nga mas mahimong bukas ang ilang buhatan alang sa katawhang Pilipino.
Sa pikas bahin, gikompirmar ni incoming ombudsman Remull nga si Usec. Fredderick Vida ang nasabutan, nilang duruha ni President Marcos nga muhupot sa iyang nabakante nga posisyon sa Department of Justice.
Gihimo ni Remulla ang pahayag human nagkita silang duruha ni Marcos sa Malacañan kagahapon, human sa iyang appointment.
