CAGAYAN DE ORO CITY, Philippines – Nagpakitabang sa Presidential Anti-Organized Crime Commission ang gobyerno sa Indonesia aron ma-rescue ang ilang mga trabahante nga nagtrabaho sa ilegal scam farms o POGO Hubs sa Lapu-lapu City, Cebu.
Kagahapon, gironda sa PAOCC ang natumbok nga gambalay ug napamatud-an sa buhatan nga dunay 162 foreign nationals ang na-rescue.
Miingon si PAOCC Spokesperson Atty Winston Casio nga walay legal POGO nga nagparehistro sa Cebu, busa kombinsido sila nga kini scam farm.
Sa pagkadiskobre sa mga otoridad, ilang nasuta ang gihimong “love scam farm” ang tolo ka mga lawak sa gambalay.
Duna usab laing lawak nga nalambigit sa sa human trafficking.
Sa katapusan, muabot sa 10 ka babaye ug usa ka minor de edad ang narescue human mitug-an nga sila tinudluan sa mga law-ay nga pagsayaw sulod sa naronda nga gambalay.
Hinoon, gitin-aw ni Casio nga wala nila gisikop ang mga lokal nga trabahante sama sa janitor, sekyu ug mga tigluto sa maong operasyon, kay wala man kini nalambigit sa ilegal nga aktibidad.
