CAGAYAN DE ORO CITY, Philippines – Mikunhod sa 1.8% ang inflation sa Marso 2025.
Namahayag si National Statistician Undersecretary Claire Dennis Mapa nga kini na ang labing ubos nga inflation rate sa halos lima ka tuig.
Kini nagpasabot nga mihinay ang “spending habits” sa mga pinoy ilabe na sa sector sa pagkaon.
Namugos si Mapa nga ang padayon nga paghinay sa pagsaka sa presyo sa mga palaliton, makatabang sa mga konsumidor ug negosyante.
Nag-unang hinungdan sa paghinay sa inflation mao ang mas hinay nga pagsaka sa presyo sa pagkaon, ug non-alcoholic beverages nga miubos ngadto sa 2.2% gikan sa 2.6% sa Pebrero 2025.
Ang transport sector nagbaton sa negatibong inflation rate nga -1.1% sa Marso, mas ubos pa sa -0.2% sa Pebrero.
Ang core inflation, nga naglakip sa presyo sa mga palaliton gawas sa pagkaon ug enerhiya, miubos ngadto sa 2.2% gikan sa 2.4% sa Pebrero.
Kini nagpasabot nga ang kinatibuk-ang presyo sa mga produkto ug serbisyo naghinay sa pagsaka.
Taliwala sa pag-ubos sa inflation, ang gobyerno nagpadayon sa pagbantay sa mga risgo sama sa posibleng pagsaka sa presyo sa kuryente ug pagkaon.
Namahayag ang National Economic and Development Authority (NEDA) nga milusad na ang ilang ahensya sa targeted interventions aron mapadayon ang kasiguruhan sa presyo.
