CAGAYAN DE ORO CITY – Pakasuhan ni City administrator Teodoro ‘Teddy’ Sabugaa Jr ang naglangkob sa Pearl of the Orient International Marian Workers Missionary Foundation Corporation ning syudad.
Kini kon mapamatud-an nga nangilad sa pipila ka senior citizens pinaagi sa pagpangulekta’g 300 pesos membership fee bugti sa imposibleng mga saad ngadto kanila.
Miingon si Sabugaa nga wala sukad moagi sa iyang opisina ang maong grupo ug nakurat na lamang kini nga may mga senior citizen na nga nahimong mga miembro.
Kbahin sa saad sa grupo nga gipanguluhan sa usa ka Engr Manuel Montarde ang paghatag sa mga miembro sa P12,000 month pension, house and lot ug debit card kantidad sa dos milyon pesos.
Samtang makigkoordinar ang Department of Social Welfare and Development o DSWD -10 sa lokal nga kagamhanan sa syudad sa pagmonitor sa maong grupo.
Si Oliver Inodeo, usa sa information officers sa DSWD -10 miingon nga walay foundation nga gapangayo sa membership fee.
Dugtong niini, gipahimangnuan ni Inodeo ang mga senior citizen nga dili magpailad tungod kay klaro kini nga scam.
Sa pagkakaron, laraw ni Inodeo nga ipaabot ilang kadagkuan aron kini maaksyonan.
Una niini,nagdumili una paghatag si Montarde dihang natawagan sa Bombo Radyo kay nabalaka kini nga magkagubot ang ilang mga miembro.
