CAGAYAN DE ORO CITY, Philippines – Misaka pa sa 511 ka tawo ang patay tungod sa monkey pox (MPOX) didto sa Congo.
Gibutyag sa World Health Organization (WHO) ang samot nga pagsaka sa kaso sa maong nasud sulod sa usa ka dekada.
Ning tuiga, mitala na ang Congo sa 14,000 ka mga kaso, ug laing 50 ang natala sa upat ka mga silingang nasud, nga wala sukad matakbuyi sa labing mamamakod nga sakit.
Gikompirmar ni WHO Secretary General Dr. Tedros Ghebreyesus nga adunay presensya sa bayrus sa MPOX sa Burundi, Kenya, Rwanda ug Uganda.
Nagpatawag sa emergency meeting ang labaw sa WHO aron aksiyonan ang nagsamot nga kaso gikan sa mga African Nations, ug aron dili kini mukuyanap nga sakit sama sa nahitabo sa COVID-19.
Ang monkey pox, usa ka klase a palokpok nga nagsumikad sa onggoy.
Komon nga sintomas niini ang skin rash, samad nga mulungtad sa duha hangtud 4 ka semana nga may sagol hilanat, pagpanakit sa ulo, pagpanakit sa likod, kaunuran, pag-ubos sa resistenya ug paghubag sa mga samad.
Kasagaran matakbuyan sa maong sakit ang mga bata gikan sa hugaw nga palibot.
Makapatay ang MPOX kung dili gilayon magpakonsulta sa doktor.
Wala pay tambal sa MPOX apan dunay duha ka klase sa bakuna ang kasamtangang gipalambo sa WHO ug Global Alliance for Vaccines and Immunization (GAVI).
Magamit lamang ang mga bakuna panahon sa emerhensiya ug kung musamot pagtubo ang kaso sa lima ka mga nasud.
