Natingala ang kampo sa kanhi Kongresista nga si Mike Defensor kung nganong sila pa ang unang gipatawag sa National Bureau of Investigation (NBI).
Gipamugos ni Defensor nga ang iyang papel limitado lamang sa paghatag sa assistance sa affidavits sa 18 ka mga nagpakilalang bagman ni Zaldy Co, ug nakurat siya nga gilakip siya sa imbestigasyon.
Alang kaniya, mas angay nga si Co mismo ang unang ipatawag aron masuta ang kamatuoran sa gibulgar sa mga kanhi sundalo nga gihimong tighatud sa mga maleta ug paper bags nga puno sa salapi.
Kauban ni Defensor sa pagbisita sa NBI ang iyang lead counsel nga si Atty. Ferdinand Topacio.
Gawas kang Defensor, mipakita usab ang 16 sa 18 ka mga kanhi marines nga mibulgar sa bribery incident gamit ang pondo sa gobyerno.
Ang ilang presensya naghatag ug dugang gimbug-aton sa imbestigasyon, aron matubag ang pangutana kung kinsa ang tinubdan ug unsa ang tinuod nga mekanismo sa pag-apod-apod sa salapi.
Sa pagkakaron, nagpabilin nga sentro sa kontrobersiya si Zaldy Co, samtang ang kampo ni Defensor nagbarug nga dili sila angay nga mahimong target sa imbestigasyon, kondili ang aktuwal nga personalidad nga giingong nagpaluyo sa operasyon.
Kagahapon, gikan mismo sa baba ni Presidente Ferdinand Marcos Jr ang pahayag nga dili pa nila mahimong ipapauli si Co sa Pilipinas.’
Namugos ang Presidente nga atua sa Portugal si Co ug walay hurisdiksyon ang Pilipinas sa maong nasud.
Siya miingon nga kinahanglan pa nila ang batang sa Portuguese government ug sa Interpol aron siya ma-aresto ug ma-repatriate.
