CAGAYAN DE ORO CITY, Philippines – Nadag-an ni Prince Harry ang kaso nga iyang ipasaka batok Rupert Murdoch, CEO sa napasirado nga mantalaan, ang News Group Newspapers (NGN), ug publisher sa mantalaang The Sun.
Giila sa 40 anyos nga prinsipe nga “monumental victory” ang pag-angkon ug pagpangayog pasaylo sa tagdumala sa duha ka mantalaan.
Nag-ugat ang kaso ni Prince Harry batok sa news group ni Murdoch tungod sa walay hunong nga pagpanguha’g impormasyon sa iyang pribadong aktibidad sugod sa tuig 1996 padulong sa 2011.
Namahayag Atty David Sherborne, lead counsel sa prinsipe nga mikompisal sa korte ang News Uk ni Murdoch ug mi-angkon sa ilang kasal-anan tungod sa ilegal nga pagpangispiya sa iyang lihok ug daghang higayon sa phone-hacking gikan sa mga reporter sa NGN.
Gawas niini, gibutyag ni Atty Sherborne nga gikompisal usab sa maong mantalaan ang pagpaninlabot nila sa namatay nga inahan sa prinsipe, nga si Princess Diana.
