CAGAYAN DE ORO CITY – Ikakita na sa dili madugay ni re-elected 2nd District City Councilor Girlie Balaba si kanhi Pres Rodrigo Duterte nga naka-kustodiya sa pasilidad sa International Criminal Court o ICC sa The Hague,Netherlands.
Kini human tumana ni Balaba nga molupad siya pa-Netherlands aron ipaabot ang kahingawa ug pag-atiman ngadto kang Duterte nga instrumento sa iyang pagkapili isip usa sa mga konsehal sa dakbayan nga anaa na sa ikatulong termino.
Wala na pa hinoon gikakita sa personal ni Balaba sulod sa pasilidad si Duterte apan gikahinagbo na niini ang ubang solid supporters nga sila Senator Robinhood Padilla,Atty Harry Roque ug uban pa.
Sa istriktong gabayan sa ICC facility, kinahanglang magpa-iskedyul una ang mga bisita ni Duterte ayha tugtan ug makasulod sa pasilidad.
Dumduman nga dugay nang managkaila si Duterte ug Balaba diin sa kampanya pa sa 2025 midterm elections,mismo si Vice Pres Sara Duterte ang nagsulti nga anaa sila’y espesyal nga relasyon.
Hisayrang daan na usab nga namahayag ang konsehal nga suod lang gyud daw sila ni Duterte diin siya dugay usab nakapuyo sa Davao City ayha miuli dinhi sa syudad.
