CAGAYAN DE ORO CITY – Direktang nangayo’g suporta gikan sa Northern Mindanao ang pamilya sa 16 anyos nga Filipino-Scottish nga kabahin sa partisipante sa sikat nga TV reality show nga nakabase sa kauluhan.
Kini human representahe ni Charlie Mediante Fleming ang Cagayan de Oro City diin siya ang pinakabatan-on nga housemate sa maong kompetisyon.
Miingon ang iyang inahan nga si Flora Mae Mediante nga unta mapaluyuhan ang tinguha sa anak niini sanglit dungog man sa Cagayan de Oro ang nakataya.
Siya miingon nga hinoon dili na bag-o sa public exposure ang iyang anak kay nalambigit man kini sa modeling,acting ingon man sa ubang mga hilig niini.
Nagbaton sa iyang basic education si Charlie sa Rosevale School Lumbia ug Bulua National High School ayha nag-homeschooling tungod sa iyang acting career didto sa kauluhan.
Kini ang hinungdan nga nangayo’g suporta gikan sa local govt unit sa syudad ug sa katawhan niini si Charlie aron magpabilin sulod sa gisudlan nila nga balay pinaagi sa pagpadala sa text messages sa gi-destino nga online numbers.
Kung malutsan ni Charlie ang mga tahas nga ipabuhat kanila,dako’g tsansa nga hayan masundan ang mga tunob ni Maymay Entrata nga gikan sa Cagayan de Oro nga big winner sa miaging edisyon sa maong reality TV show.
Hisayrang nga ang naila nga ‘bubbly bread teener’ sa syudad ang nagsilbi usab nga 3rd placer sa Little Ms.Kagay-an 2014 nga naninguha makahimo’g kasaysayan sulod sa Pinoy Big Brother o PBB House.
