CAGAYAN DE ORO CITY – Nakuhaan sa illegal nga armas sa Criminal Investigation and Detection Group (CIDG) ang kanhiay alkalde sa Pantar, Lanao del Norte sulod sa iyang panimalay.
Kini human gironda sa mga sakop sa CIDG-Iligan ang panimalay ni ex-mayor Malik Tumampad Alingan sa Barangay Poona Punoc sa maong lungsod pinaagi sa search warrant nga gi-isyu ni Regional Trial Court Executive Judge Alberto P. Quinto.
Maoy narekober sa CIDG ang usa ka .45 caliber pistol.
Apan, hugot nga gipanghimakak sa kanhi alkalde nga iyang gipanag-iyahan ang mga armas apan giangkon niini nga aduna siya’y tulo ka .45 caliber pistol apan nawala ang duruha.
Gibutyag ni CIDG official Police Major Jomar Penullar nga ilang gihimo ang pagpang-ronda human sila makadawat sa report nga may gitago nga mga armas ang kanhi alkalde.
Dugang pa niini nga seryoso usab sila sa ilang kampaniya batok sa mga loose firearms nga posibleng gamiton sa pagpang-harass sa May 13 midterm election.
