(Update) CAGAYAN DE ORO CITY – Gikompirmar na sa Philippine Army ang kamatayon sa kapikas ni late New People’s Army national operations commander Joerge Madlos alyas Ka Oris nga si Myrna Sularte alyas Kumander Maria Malaya sa usa ka engkuwentro sa Butuan City kaganihang hapon.
Gibutyag ni Philippine Army spokesperson Col. Louie Dema-ala nga bag-uhay lang niya nadawatan ang kompirmasyon gikan kang 4th ID commanding officer Major Gen Michelle Anayron nga dunay koordinasyon sa tropa sa Caraga region.
Miingon si Dema-ala nga dili pa niya mahatag ang detalye sa maong engkuwentro kay giagad nila ang operationa unit nga mismo mopagawas niini.
Dumduman nga ubos sa operational control sa Eastern Mindanao Command sa AFP nga nakabase sa Davao City ang 4th ID.
Tungod sa hitabo,namahayag ang AFP nga dako kini nga kawad-on sa kalihukang CPP-NPA nga nakuha na ang usa sa pinakadakong opisyal sa armadong kalihukan nga dugay’ng panahon gitinguha masignit sa gobierno.
Hisayrang si Malaya adunay patong sa ulo nga P5.4 milyon tungod sa daghang kasong gipang-atubang niini sa nagkadaiyang korte sa Mindanao.
