(Update) CAGAYAN DE ORO CITY – Gitakdang mag-atubang sa duha ka kasong kriminal ang drayber sa wing van nga kargado sa mga likid nga unang gisungag sa motorsiklo nga nakasakay ang lima miembro sa pamilya sa Brgy Gimangpang,Initao,Misamis Oriental.
Kini human nag-resulta sa gilayong kamatayon sa maong mga biktima nga gilangkuban sa magtiayon ingon man 3 nila ka pulos menor de edad nga mga anak nga giapilan sa duha ka lalaki ug babaye.
Subay sa spot report nga gipasa sa Initao Police Station ngadto sa buhatan ni Misamis Oriental Police Provincial Office Director Col. Wilbur Salaguste nga pauli na sa Iligan City ang mga biktima gikan dinhi sa syudad dihang mihimo’g pag-overtake sa laing pribadong sakyanan rason nasungag ang van.
Dugang sa imbestigasyon nga mihimo pa sa paglikay ang van driver apan tungod sa kaapiki na sa sitwasyon,natigayon ang dugu-ong bangga.
Tungod sa kakusog sa impact sa bangga,diritso na nahunusan kinabuhi ang mga biktima sa mismong accident area.
Gilayong gitug-an sa van driver ang iyang kaugalingon sa kuwerpo sa kapolisan alang sa dugang imbestigasyon samtang gisaulog ang Valentines Day kagahapon sa hapon.
