CAGAYAN DE ORO CITY – Pasado ang resolusyon diin nagtumong sa paghatag kasiguruhan nga nagbaton sa kahusay,kalinaw ug puno sa gugma ang katawhan nga naglangkob sa syudad.
Kini ang tipik sa garay sa resolusyon numero 2025-1070 nga gipangamahan ni City Council Majority Leader Kag. Edgar Cabanlas nga gituki sa ilang sesyon diin nagpadayag nga nadismaya sila sa pahayag ni Misamis Oriental Gov. Peter Unabia kabahin sa pagkahisguti sa mga igsoong Muslim sa kampanya niini sa lungsod sa Villanueva ning lalawigan sa miaging Abril 3.
Miingon si Cabanlas nga wala nila damha nga malitok kini ni Unabia sanglit taas ang ilang pag-ila kaniya isip nagdumala sa probinsya.
Siya miingon nga kung unsa man ang nasampit sa gobernadorr nga nakapa-dismaya sa mga igsoong Muslim,wala kini ikalipay sa mga nanimuyo sa syudad.
Una usab niini,nangayo na’g pasaylo si Unabia kung unsa man ang nahatag niya nga kasakit ngadto sa mga igsoong Muslim ug miklaro nga wala niya pihiga apan kanunay’ng kuyog sa pag-ugmad sa lalawigan.
Hisayrang sulod ning adlawa,nakigtagbo usab si Unabia sa inter-faith leaders sa Archdiocese of Cagayan de Oro Archbishop Palace aron ipasabot ug direktang nangayo’g pasaylo sa Muslim community leaders kabahin sa maong isyu.
