Gipahimangno ni kanhi Iligan City Mayor Atty. Franklin Quijano nga ang grabe nga pagbaha sa Iligan City, nga nakaapekto sa daghang barangay tungod sa ulan nga dala sa Bagyong Basyang, mahimong malikayan pinaagi sa insaktong pagdumala sa pondo ug pagprayoridad sa kinahanglan sa katawhan ug sa syudad.
Miingon si Quijano nga dili siya gustong mangbasol sa bisan kinsa, apan nagatoo siya nga ang kakulang sa maayong flood preparedness ug mismanagement sa gobyerno usa sa hinungdan ngano nga mas grabe ang epekto sa kalamidad.
Giingon pa niya nga ang kakulang sa pag-prayoridad sa flood mitigating projects mao ang rason nganong nakaapekto kini sa liboan ka katawhan sa syudad sa miaging bagyong Basyang.
Makasubo matod pa ni Quijano nga kung ang gobyerno magpokus lamang sa insaktong pagdumala ug pagpatuman sa mga proyekto para sa kaluwasan sa katawhan, daghang negatibong epekto sa sunod nga kalamidad ang malikayan. (James Oliver)
