Gipamugos ni Senate Pro-tempore Panfilo Ping Lacson nga siya ang kanunay target ni Senador Rodante Marcoleta sa iyang manifestation ug priviliege speeches sa senado.
Gihimo ni Lacson ang pahayag human ang ilang init nga debate sa Senado kagahapon. Siya miingon nga dugay na unta niya gusto tubagon ang mga isyu nga gibato kaniya ni Marcoleta apan gi-abisohan siya sa majority floor leader nga likayan nalang ang init nga lantugi.
Mahinumduman nga nagsugod ang ilang bangi sa dihang nahulipan ni Lacson si Marcoleta isip chairman sa Senate Blue Ribbon Committee, ug misamot pa kini dihang managlahi ang ilang baruganan sa kaso sa magtiayong Discaya.
Ang pinakabag-o nilang panagbangi mao ang isyu sa China, Kalayaan Island Group, ug ang managlahi nilang posisyon bahin sa West Philippine Sea.
