CAGAYAN DE ORO CITY-Gitulis sa tulo ka armadong tulisan ang branch sa LBC nga nahimutang sa Brgy Bulua ning syudad karong hapon lamang.
Gisulti sa empleyado sa LBC-Bulua Branch nga si Flordeliz nga paspas ang pagsulod sa mga tulisan hinungdan nga wala makalihok ang mga empleyado.
Dili pa mabutyag kon pila ang kantidad sa salapi nga nadala sa mga tulisan nga daling misibat palayo sa lugar.
Una niini,gitiunan pa sa mga suspek ang gwardiya nga nagbantay sa silingan nga gasoline station sa pagtoo nga kini mo-responde sa maong hitabo.
Kini ang ikatulo nga pagpanulis sulod ning tuiga diin unang giatake sa mga tulisan ang duha ka branch sa magkalahing lugar sa Divisoria area ning syudad.
Samtang gilusad sa kapolisan ang hinuisang manhunt operation batok tulo ka tulisan nga mihimo’g pagtulis sa branch sa LBC ning syudad.
Miingon si Bulua Police Station commander Breccia Ruth Townend nga may lead na sila kon kinsa ang posibleng mihimo sa pagtulis sa maong cargo branch ning hapona lamang.
Dugang ni Townend nga hulaton pa nila ang kopya sa CCTV sa maong establisimiento aron matandi ang mga dagway sa ubang mga suspek nga utok sa mga pagpanulis sa laing LBC branches sa syudad naglabay’ng katuigan.
