Gipadayun sa siyudad sa Cagayan de Oro ang pagdawat og mga aplikante alang sa City Scholarship Program para sa mga aspiring scholars ubos sa lokal nga kagamhanan sa siyudad.
Gipahibalo ni Jade Adeser, City Information Officer, nga abli pa ang pagdawat sa mga dokumento hangtod Marso 15, samtang planong ipahigayon ang scholarship examination sa Abril 24.
Giawhag sa kagamhanan sa siyudad ang mga estudyante nga sulayan ang maong oportunidad tungod kay dako ang ikatabang niini sa mga pamilya, ilabi na nga makalibre na sa tuition sa kolehiyo ang mga makapasa.
Dugang pa, matod ni Adeser, tabangan usab sa opisina ang mga scholars sa pagmintinar sa ilang mga grado ug paggiya kanila aron mapadayon ang maayong performance sa eskwelahan.
Sumala ni Adeser, ang City Scholarship Program usa ka pamaagi sa lokal nga gobyerno aron mas daghang kabatan-onan ang matagaan og kahigayunan nga makapadayon sa kolehiyo ug makab-ot ang ilang mga pangandoy pinaagi sa edukasyon.
