CAGAYAN DE ORO CITY – Giatbanga’g transport-pahulay sa ubay-ubay’ng transport cooperatives ang ikaduhang adlaw sa pagpatuman sa Local Public Transport Route Plan o LPTRP ning syudad.
Kini tungod kay mibati’g kadehado ang mga rota sa gipatuman sa syudad nga lakang isip kabahin sa modernization program sa kagamhanan.
Gibutyag ni United Drivers Association o UNIDA Pres Joel Gabatan nga nakurat kini sa gihimong hukom sa ilang mga miembro kay naghatag siya’g abiso nga tahuron ug hataga’g duha ka bulan nga obserbasyon kung ikaayo ba sa transportasyon ang maong programa.
Siya miingon nga hukom sa maong mga drayber ingon man operators ang pagdumili una pagbiyahe aron mokuha’g mga pasahero sa mga malabyan nga bag-ong mga rota niini.
Una nang gibutyag ni Roads and Traffic Administration o RTA manager Engr. Nonito Oclarit nga paagi kini aron mahapsay ang dagan sa trapiko ug mahatagan sa igong kahigayon ang ubang mga lokasyon nga maagian sa mga pasayruan nga salakyan sa dakbayan.
Sa pagkutlo ning balita, wala pa’y komento ang RTA ingon man Land Transportation and Franchising Regulation Board kabahin sa nahimong aksyon sa mga drayber-operators.
