CAGAYAN DE ORO CITY – Gitugtan na pinaagi sa mando-ehekutibo ni City Mayor Rolando ‘Klarex’ Uy ang mga buhing baboy ug mga karne niini sa syudad bisan gikan pa sa mga lugar sa Luzon nga positibo sa African Swine Fever o ASF.
Kini nga mando sa mayor ang pinasikad sa executive order no. 464-2024 diin mi-epekto’g sugod sa petsa 8.
Apan giklaro sa kamanduan nga makasulod lang ang maong mga producton kon masunod ang istrikto nga gabayan kontra sa ASF gikan sa City Veterinary Office,Department of Agriculture ,Food and Drug Administration ug National Meat Inspection Service alayong sa katuyuan.
Dugtong niini,gipasabot pa ni acting City Veterinarian Dr. Helen Ann Tacandong nga walay makasulod sa bisinidad sa dakbayan kon walay papeles ug pagtugot sa DA, FDA, ug NMIS ang maong mga produkto nga mosulod ning syudad ug sa Misamis Oriental.
Hisayrang nagpatuman ang syudad sa temporary total ban pagpasulod sa hogs ug tanang pork products gikan sa Luzon ug ubang lugar nga apektado sa ASF niadtong Sept. 27, 2019.
