CAGAYAN DE ORO CITY – Patay ang mag-amahan human tigbasa sa ilang silingan diha sa Brgy Pungol, Libona,Bukidnon.
Giila ang mga namatay nga sila si Eddie Baculio, 46-anyos ug Jason Baculio, 25-anyos nga pulos residente sa maong lugar.Sumala ni Libona Police Station commander Police Capt. Dino Cuevas nga pagdumot ang motibo sa krimen diin napatay sa suspek nga si Teddy Baguio, 36-anyos ang mga biktima.
Nasuta nga gisumbag sa mag-amahan si Baguio sulod sa bulangan ug gisundan pa kini sa pagpauli dala ang ilang sundang ug improvised shot gun. Gisulayan sa mag-amahan nga patyon si Baguio apan nailog sa suspek ang sundang ug improvised shot gun nga dala niini.
Sa nahitabong komosyon, natigbasan ang liog ni Eddie ug naputol ang kamot niini samtang naigo sa dughan si Jason nga miresulta sa ilang kamatayon.
Nag-atubang na sa kasong reckless imprudence resulting to multiple homicide ang suspek kinsa nakabaton sa samad sa tiil ug padayon pang gitambalan sa balay-tambalanan.
