CAGAYAN DE ORO CITY – Sulbad na ang kaso apan dili pa hingpit nga sirado ang kasong pagpatay sa radio broadcaster nga si Juan Jumalon alyas Johnny Walker nga taga-Misamis Occidental.
Namahayag si Philippine National Police spokesperson Col Jean Fajardo nga nadakpan na sa mga operatiba ang suspek nga mipusil patay kang Jumalon.
Naila ang dinakpan nga si Julito Mangumpit alyas ‘Ricky’, kinsa nasikop sa Misamis Occidental ug Zamboanga del Norte PNP sa Dipolog City kagahapon sa kadlawon.
Nasuta nga profile ang ngalan ni Ricky isip kanhi aktibong miembro sa New People’s Army ug daan nang dunay standing warrants of arrest sa kasong murder, frustrated murder, direct assault ug pagkalambigit sa pagpayuhot sa ilegal nga druga.
Sa pagkakaron padayong gilakag sa mga otoridad ang mastermind sa paglikidar sa magsisibya sa radyo.
Hisayrang sa miaging mga bulan,una nang nadakpan ang duha sa mga kauban ni Ricky nga giingong manag-kabanay.
