Puro bakak.
Kini ang tubag sa kanhi representante sa Alliance of Concerned Teachers (ACT) Partylist nga si France Castro, human gilambigit ang iyang ngalan sa usa sa nahatagan sa bulsita nga puno sa kickback nga salapi, gikan sa pondo sa flood control projects, nga gi-apud-apud ni kanhi Ako Bicol Partylist Representative Zaldy Co.
Sa exclusive interview sa BOMBO Hanay sa Udto Program, gipamugos ni Castro nga tataw kaayo ang motibo nga ihagba ang iyang ngalan pinaagi sa testamento sa 18 ka kanhi Philippine Marines nga nagsilbing mga resource person sa Senate Probe sa bloke nila Senate President Alan Peter Cayetano.
Una niini, namatikdan ni Castro nga managlahi ang ilang gipakatag nga impormasyon gikan sa ilang mga gilusad nga press conference itande sa ilang mga gisaysay sa Flood Control Probe ubos sa chairmanship ni Senador Rodante Marcoleta, kagahapon.
Lakip sa bantayan sa kampo ni Castro ang mga gibag-o, gikulangan, ug gidugang nga mga ngalan nga implicated o nalambigit sa iskandalo uban ni Zaldy Co.
Subli, gipamugos ni Castro nga sukad sa unang panahon, walay gikalambigitan nga flood control projects ang grupong Makabayan bloc sa kamarabaha.
