CAGAYAN DE ORO CITY, Philippines – Gipalanog ni Atty Salvador Medialdea, legal counsel ni kanhi Presidente Rodrigo Duterte ang pagkadesperado ug political harassment sa Marcos Jr Administration kalabot sa ilegal nga pagsikop sa iyang kliyente ug pugsanong pagpalupad sa korte sa ICC nga walay igong pagpahibalo ug walay kopya sa arrest order.
Sa manifestation nga gihimo ni Medialdea atubangan sa mga huwes sa ICC, iyang gipamugos nga kidnapping ang gihimo sa administrasyon ni Ferdinand Marcos Jr sa iyang kliyente.
Gipamahayag sa abogado nga wala’y hurisdiksyon ang ICC sa Pilipinas tungod kay ang nasud miatras na sa Rome Statute tuig 2018.
Gipamugos sa kampo ni Dueterte nga dili angay nga ipadayon ang iyang kaso sa langyaw nga korte kay aduna pay naglihok nga justice system ang nasud sa Pilipinas ug tin-aw nga intensyonal ug pagpamulitika ang atake sa kasamtangang administrasyon.
Una niini, gipadayag sa ICC nga mismo ang gobyerno ni President Marcos ang mihatag kanila sa tanan kopya sa mga dokumento ug uban pang ebidensya aron mataral sa ICC ang 80 anyos nga si Duterte.
Misukwahi kini sa unang pamahayag ni Marcos, niadtong 2022, nga dili mokooperar sa ICC kay wala kini hurisdiksyon sa kaso ni Duterte.
