CAGAYAN DE ORO CITY – Gipildi sa ikaduhang higayon sa veteran team nga Boston Celtics ang mga magdudula sa Dallas Mavericks alayon sa ilang game 2 sa National Basketball Association o NBA finals kaganihang buntag.
Kini human panguluhi nila ni Jrue Holiday ug Jayson Tatum ang Boston aron kuhaon ang ikaduhang kadaugan batok Mavs sa pinal nga iskor nga 105-98.
Misakmit si Holiday sa 26 puntos samtang 18 points usab ang natampo ni Tatum aron serohan ang Mavs sa mismong balwarte sa Boston nga unang duha ka mga dula.
Nakapalig-on usab sa kadaugan sa Celtics sila Jaylen Brown nga may 21 puntos ug Derrick White nga dunay 18 puntos.
Samtang ang Dallas ang gipanguluhan usab ni Luka Doncic nga nagkupot sa 32 puntos,11 ka boards ug 11 ka assists.
Miabag kang Luka si P.J. Washington sa iyang 17 points, Kyrie Irving,16 ug Daniel Gafford sa iyang 13 puntos.
Himoon ang game 3 sa mismong tugkuran na sa Mavs diin bintaha na sa ilang fans batok Celtics sa adlaw’ng Huwebes sa buntag.
