CAGAYAN DE ORO CITY – Gikompirmar sa Securities and Exchange Commission o SEC-10 nga dako ang posibilidad nga mag-atubang sa kaso ang mga nagpa-miembro sa Kabus Padatoon o KAPA.
Gibutyag ni SEC-10 regional director Atty Reynato Egypto nga maoy atubangon nga kaso sa mga miyembro sa KAPA ang paglapas sa Republic Act No. 8799 o Securities Regulation Code ug posible usab nga makasuhan sila sa syndicated estafa.
Subling gitin-aw sa opisyal nga wala sila magkulang sa pagpahimangno sa publiko kalabot na sa pagpangilad nga gihimo sa maong grupo ug dili kini angayang suportahan sa publiko.
Hisayran nga nagpaggawas na’g kamanduan ang Court of Appeals nga e-freeze ang mga bank accounts ug uban pang assets nga konektado sa Kapa.
Samtang, gipanganti ni Egypto nga dili sila mohunong sa ilang kampaniya batok sa Kapa hangtud dili mahunong ang illegal nga operasyon niini.
Si Egypto miingon nga ilang paningkamutan kauban ang kapulisan ug NBI-10 nga mapasira ang maong buhatan subay sa kamanduan ni Pres Rodrigo Duterte.
Gihangyo usab niini ang publiko nga mapadali ang ilang pagpahunong sa illegal nga operasyon sa KAPA kon ugaling suportahan ug tabangan sila sa publiko pinaagi sa dili pag-invest niini.
Una nang gibutyag sa SEC nga nagkinahanglan sa P15 billion nga pondo ang KAPA aron mabayaran ang 5 million ka miyembro niini ilabina kadtong naka-invest sa dili mominus P10,000.
