CAGAYAN DE ORO CITY – Dakpon na sa City Local Environment and Natural Resources o CLENRO ang mga sakyanan nga nagbuga’g baga nga aso sa syudad.
Kini human ang duha ka bulan nga pagpanghatag sa libreng pagpasusi sa mga sakyanan ilabina sa nakalapas sa Clear Air Act o Republic Act 8749.
Gibutyag ni CLENRO head Engr. Armen Cuenca nga ilang himoon ang pagpangdakop gikan adlaw nga Lunes hangtud Biyernes, alas-9:00 hangtud alas-4:00 sa hapon sa mga mosulod-gawas sa syudad.
Dugang ni Cuenca nga tumong niini nga mahimong limpyo ang palibot ug preskong hangin ang malanghab sa katawhan sa dakbayan.
Nasayran nga ang makalapas sa unang higayon sa maong ordinansa dunay P500 nga multa ug P1,000 sa ikaduhang kalapasan samtang suspendihon ang Motor Vehicle Registration sulod sa unom ngadto sa usa ka tuig alang sa ikatulong kalapasan.
