CAGAYAN DE ORO CITY-Giila sa liderato sa Moro Islamic Liberation Front o MILF ang dakong papel ni kanhi Pres Noynoy Aquino aron mapalig-on ang otonomiya sa Bangsamoro region.
Gihimo ni MILF peace implementing panel chairman Mohagher Iqbal nunot sa pagpanumpa nila isip miembro sa Bangsamoro Transition Authority o BTA sa Malakanyang sa naglabay’ng adlaw.
Miingon si Iqbal nga miagi usab sa daghang hagit ang paningkamot ni Aquino ug MILF pagkab-ot sa kalinaw ayha hingpit gipalig-on ni Pres Rodrigo Duterte ang Bangsamoro Organic Law o BOL.
Samtang gidepensaan ni Iqbal ang pagkalakip ni Abdullah Macapaar alyas Commander Bravo sa BTA. Sumala ni Iqbal nga ilang gihatagan sa rekonsiderasyon si Bravo bisan sa giatubang niini nga mga kaso.
Asoy niini nga dili nila makab-ot ang tinooray nga kalinaw kon dili nila apilon si Bravo sa 81-members sa BTA.
Una nang gibutyag ni Pres Rodrigo Duterte nga gikinahanglan si Bravo sa BTA tungod sa iyang pagka-warrior ug mao lamang kini ang paagi aron matapos ang iyang pagka-rebolusyonaryo.
