CAGAYAN DE ORO CITY – Gihimakak sa Minergy Power Corporation o MPC ang pasangil sa rebeldeng New People’s Army o NPA nga nadaot ang kahimtang sa kinaiyahan sa Sitio Bawsan,Brgy Quezon,Balingasag,Misamis Oriental.
Kini human kompirmaha ni Minergy Power Corporation Community Relations Staff Ian Kenneth Bicar nga nailog sa 30 ka NPA rebels ang lima ka AK-47 rifles sa mga sekyu nga gitahasan nila’g pabantay sa quarry site kagahapon sa buntag.
Gibutyag ni Bicar nga dili tinood ang gipanulti sa NPA nga nagpasagad ang kompanya sa kinaiyahan kay may 3-mil 500 ka native hardwood trees na sila nga natanom sa Brgy Quezon ug Brgy Kibaban sukad tuig 2015.
Giangkon sa Minergy nga gikasubo nila ang gihimo sa NPA ngadto kanila apan ipadayon gihapon niini ang ilang pakig-koordinar sa katilingban aron makahatag kalambuan sa katawhan nga nanimuyo sa maong lugar.
