CAGAYAN DE ORO CITY – Gihulatan sa Police Regional Office 10 ang pagdungog-pormal sa murder case batok sa tulo ka dinakpang armadong suspek pagpatay sa magsisibya nga si Juan Jumalon alyas DJ Walker sa lungsod sa Calamba,Misamis Occidental.
Kini aron masuta sa court hearing kon kinsa ang nagsugo sa mga akusado nga patyon si Jumalon kinsa kamulo nga programa sa gipanag-iya nga radio FM station sulod sa iyang balay niadtong Nobyembre 5,2023.
Miingon si PRO 10 spokesperson Maj. Joann Navarro nga mahingpit lang mahatag ang hustisya sa pamilya ni DJ Walker kon mapatug-an ang mga akusado nga sila Julito Mangumpit alyas Ricky taga-Zamboanga del Norte;magparyente nga si Boboy ug Renato Bongcawel nga taga-Sapang Dalaga,Misamis Occidental kon kinsa ang posibleng nagsugo kanila sa kremin.
Siya miingon nga dagha’g atraso si Mangumpit hinungdang magpuli-puli sa pagkustodiya ang Misamis Occidental PNP ug Zamboanga del Norte PNP kang Mangumpit sa matag-dungog sa korte sa iyang mga kaso.
Dumduman nga mitanyag pa sa halos 4 milyones pesos nga reward money ang Misamis Occidental-LGU;Presidential Anti-Organized Crime Commission ug Presidential Task Force on Media Security aron mapadali ang pagsulbad sa kamatayon sa biktima.
Tipik sa anggulo sa kremin ang kabahin sa negosyo,trabaho ug personal.
Nagsumikad ang warrant of arrest pagdakop kang Mangumpit gikan sa sala ni Judge Michael Ajoc sa Regional Trial Court Branch 36, 10th Judicial Region sa Misamis Occidental.
Nadakpan si Mangumpit sa Dipolog City sa miaging semana samtang ang mag-paryenteng Bongcawel sa Sapang Dalaga sa Misamis Occidental sa miaging Marso 2024.
