CAGAYAN DE ORO CITY– Gihagit sa Philippine Drug Enforcement Agency Northern Mindanao ang warden sa Misamis Oriental Provincial Jail nga mo-resign sa katungdanan.
Kini human gikuwestiyon ang iyang moral ascendancy human giingong nagsilbing protektor sa iyang duha ka anak nga tigpayuhot sa ilegal nga druga sa Brgy. Carmen ning syudad kaganinang buntag.
Gibulgar ni PDEA-10 Regional Director Wilkins Villanueva nga gitaguan pa ni MOPJ Warden Dominador Tagarda ang iyang mga anak nga sila Gregor ug Von Clienton sa Gingoog City, ayha gipabalik sa ilang compound sa nasampit nga brgy.
Gikastigo ni Villanueva ang si Tagarda tungod kay tin-aw nga obstruction of justice ang iyang nalampas sa dugay nang panahon.
Miingon ang PDEA-10 nga dugay nang DI-Listed ug high valued targets ang mga anak ni Tagarda.
Samtang namugos si Tagarda nga wala niya gikonsintir ang dautang binuhatan sa iyang mga anak.
Gani, dili pa kombinsido si Tagarda kon sa iyang anak ba ang nakuhang druga sulod sa ilang compound human namugos ang usa sa iyang anak nga si Gregor nga planted ang tanan ebidensya batok kanila.
Samtang gidepensahan ni Agent X si Tagarda human gikompirma sa ahente nga walay labot sa search warrant ang amahan sa Tagarda Brothers.
Miingon si Agent X nga usa ka ligdong nga trabahante sa gobyerno si Warden Tagarda, apan isip kabahin sa panawagan sa gobyerno, responsibilidad usab niini ang iyang mga anak.
