CAGAYAN DE ORO CITY- Wala mahinayon ang pagpasakag kaso batok sa 19-anyos nga si Niel Christian Jay Raboi nga taga Brgy Lumbia human nalambigit sa disgrasya sa syudad sa milabayng adlaw.
Kini human nga nagkasabot nga magbaton sa amicable settlement ang pamilya ni Raboi ug ang pamilya sa namatay.
Kahinumduman nga nagkabangga ang gimanehong pick up ni Raboi ug motorsiklo ni Victor Lopez Jr, 31-anyos,residente sa Matalam,Cotabato City sa dalang CM Recto sa syudad niadtong adlaw’ng Sabado diin ang maong hitabo ang miresulta sa kamatayon niini.
Gibutyag ni Agora Police Station traffic investigator Police Master Sgt. Junel Monterola nga tungod sa maong panagsabot, ila na usab nga gibuhian si Raboi.
