CAGAYAN DE ORO CITY – Walay pag-ubos apan dugang paglahutay sa mga programa ug opensiba ang ilusad sa armadong kusog sa nasud kontra nabiling mga sakop sa Communist Party of the Philippinew New People’s Army o CPP-NPA sa mga kabaryuhan.
Kini ang tubag-mensahe ni Philippine Army spokesperson Col. Louie Dema-ala nunot sa baruganan ni Pres Bongbong Marcos nga walay mahitabong pagbungkag sa kontrobersyal nga National Task Force to End Local Communist Armed Conflict o NTF-ELCAC kay giingong nabulit sa tawhanong abuso.
Miingon si Dema-ala nga nalipay sila sa pasalig ilang commander-in-chief kinsa saksi sa mga resulta sa paningkamot sa whole of the nation approach aron ipabalik-gobierno ang daghang mga rebelde sa kabukiran.
Gisugdan ang NTF-ELCAC sa panahon ni kanhi Pres Rodrigo Duterte ug gipadayon ni Marcos tungod sa positibong pagtubag sa insurhensiya sa nasud.
Samtang dugang duha ka ‘weakened guerilla fronts’ sa CPP-NPA ang na-dismantol sa militar epekto sa whole of the nation approach ubos sa Marcos administration.
Kini human unang namahayag sa Bombo Radyo si Dema-ala nga anaa na lang sa 11 ka aktibo apan luya nang guerilla fronts ang gipangbungkag ni Pres Bongbong Marcos sulod ning tuiga.
Gibutyag ni Dema-ala nga ang pagkahugno sa dugang duha ka NPA fronts ang epekto sa mass surrenders sa combatants niini kay wala na’y suporta gikan sa masa.
Dumduman nga ubos sa Northern Mindanao ug Caraga regions,ubay-ubay’ng top CPP-NPA commanders ang sunod-sunod nga mibalik na sa kagamhanan.
