CAGAYAN DE ORO CITY – Nabawian sa sobra 11 milyones pesos nga gitoohang shabu ug marijuana ang 90 ka suspek sa gilusad nga magkalahing operasyon sa lower units sa Police Regional Office 10 sa Northern Mindanao.
Gibutyag ni PRO 10 Director Brig Gen Jaysen De Guzman nga sa ilang gilusad nga weeklong anti-criminal operations,anaa sa 205 ka indibidwal ang nadakpan nga naglakip sa 90 nga nakuhaan sa 1,720.102 gramos nga gidudahang shabu ug pila ka gramos usab sa marijuana.
Gawas sa 82 ka anti-criminal operations, nakadakop usab ang PNP sa 25 ka personalidad nga nalambigit sa illegal nga pasugal.
Nahipos na usab sa mga otoridad ang 77 ka indibidwal nga adunay nagkadaiyang mga klase sa kasong criminal nga naka-pending sa mga korte sa rehiyon.
Tungod niini,gipasalamatan ni De Guzman ang lower units nga wala batia kaluya’g kakapoy apan puno sa kadasig pagtubag sa kasuguan gikan sa ilang national headquarters.
