CAGAYAN DE ORO CITY – Gipiangan pa sa Philippine Drug Enforcement Agency 10 ang kalihukang-ilegal sa mga sindikato sa gidiling droga nga naglihok sa Northern Mindanao region.
Kini human gipadayon ug gipalig-on ni PDEA 10 regional director Alex Tablate ang kampanya kontra illegal drugs isip bag-ong amahan sa maong ahensiya sa rehiyon.
Gibutyag ni Tablate nga sukad pagpuli niya sa iyang gisundan nga si incumbent PDEA 1 regional director Atty. Benjamin Gaspi niadtong miaging mga semana, sobra 900 gramos ang nasakmit sa mga operatiba gikan sa mga operasyon.
Nagkahulugan nga anaa sa bana-bana nga kapin 6 milyones pesos nga kantidad na sa gitoohang shabu ang nakompiskar sa pagpangulo sa ahensiya.
Dili moubos sa 15 ka suspected shabu dealers ang nasakote sa magkalahing operasyon.Si Tablate ang dili bag-o sa bisinidad sa rehiyon kay kini ang iyang pinakaunang assignment area gikan sa paggraduwar sa PDEA Academy ayha na destino sa nagkadaiyang units palibot sa nasud.
Ulahi niya gipanguluhan ang PDEA 7 diin pinakadako nga nasakmit niya ang 25 kilos sa gitoohang shabu sa Cebu City balor sobra 100 milyones pesos.
