(Update) CAGAYAN DE ORO CITY – Mitala sa 7 milyones pesos ang pagkasunog sa 21 ka balay diin 19 niini ang hurot sa pagkaugdaw sa dakong sunog sa Block 3,Ramonal Village,Brgy Camaman-an ning syudad kagahapon sa buntag.
Kini subay sa labing ulahi nga listahan nga gilugwa sa mga trabahante sa maong brgy ning adlawa.Gibutyag ni Camaman-an Brgy Child Devt Teacher team leader Leo Yamut nga kasamatangang gipahimutang ang 207 ka indibidwal o halos 60 ka pamilya sa covered court sa maong brgy sugod kagahapong adlawa.
Gibutyag ni Yamut nga pasiunang nahatagan na sa nag-unang panginahanglan ang mga biktima sa trahedya gikan sa brgy,CSWD ug sa ubang govt officials sa dakbayan.
Unang nagsugod ang pag-ulbo sa kalayo sa lawak sa boarder sa ikaduhang andana sa balay nga gipanag-iya ni Magno Monares Jr.
Una niini,wala pa’y gilugwa si Nazareth Fire Station commander Fire Insp Willy Tan kon unsa ang hinungdan sa pag-ulbo sa dakong sunog sa maong lugar.
Hinoon,walay bisan usa ka residente nga samaron o nakalas atol sa maong hitabo.
Samtang prioridad karon nga matunol sa brgy ang mga bugas ug de lata nga pagkaon alang gatusang residente nga apektado sa dakong sunog ning syudad.
Kini ang direkta nga hangyo ni Camaman-an Punong Brgy Pedro Arda alang sa iyang mga residente nga temporaryong gipahumtang sa covered sa maong lugar.
Gibutyag ni Arda nga modawat sila sa tanang klase sa mga ayuda diin naghulat ang ilang staff sa brgy hall o mismo sa covered court nga nakabase ang mga biktima sa trahedya.
