Unconstitutional ug usa ka bayolasyon sa balaod kung matuman ang pag‑postpone sa Barangay ug Sangguniang Kabataan elections karong Nobyembre 2 ning tuiga.
Matod ni former NLRC Commissioner ug political science expert, Atty. Proculo Sarmen sa iyang interbyu sa Bombo Radyo, ang maong plano supak sa Konstitusyon ug makalapas sa katungod sa katawhan sa pagpili sa ilang mga lider.
Giingon pa ni Sarmen nga ang krisis karon sa nasud dili mahimong legal nga basehan sa postponement sa eleksyon, kay lahi kini sa sitwasyon sa COVID‑19 nga adunay deklaradong emergency.
Dugang pa niya nga ang argumento sa paggasto sa eleksyon dili usab makapamatarong sa postponement, ilabi na kay adunay nakalaan nga budget para sa preparasyon sa maong eleksyon.
Matod pa niya, ang maong pondo dili angay i‑divert ngadto sa ayuda kay mahimo kini nga paglapas sa balaod.
Giingon usab sa eksperto nga ang pag‑postpone sa eleksyon walay lig‑on nga rason ug mahimong makadaot lamang sa demokratikong proseso sa lokal nga gobyerno.
Busa gipanawagan sa eksperto nga timbangon ug husto ang maong sitwasyon ayha kini desisyonan.
