Suportado sa First Labor Organization of Cagayan de Oro City Water District (FLOW) ang pagbasura sa Civil Service Commission sa 301 appointment ni Local Water Utilities Administration (LWUA) Appointee Fermin Jarales.
Subay sa gipagula nga press release sa CSC, wala nila aprobahi ang gi-hire nga gatusang empleyado ni Jarales kay kuwestiyonabli pa man ang legalidad ug otoridad sa iyang posisyon isip Interim General Manager (IGM) sa Cagayan de Oro Water District (COWD).
Ang resolusyon nga iyang gisumiter sa CSC, aron suportahan ang iyang pagka IGM, wala nakapamatud nga siya adunay awtoridad sa pag-appoint, ug mismo ang CSC mipahayag.
Subli gipamugos sa FLOW nga sila nagpailawom sa prinsipyo nga ang tanang personnel actions, labi na kadtong may dakong epekto sa union members, kinahanglan striktong masunod ang Civil Service laws ug may kalabutan nga regulasyon.
Sukad pa kaniadto, kanunay nang gilalisan ang awtoridad ni Jarales sa pag-hire, pag-appoint, ug pagdisiplina sa mga empleyado, kay siya wala giila isip saktong napili nga opisyal sa gobyerno.
Gidayeg sa FLOW ang COWD Management sa ilang paspas nga pagpakita sa aksyon sa maong isyu ug sa paghatag sa kasayuran sa mga empleyado nga naapektuhan.
Labaw sa tanan, nagpasalamat ang FLOW sa ilang mga miyembro sa pagpakita sa espiritu sa panaghiusa, kusog ug panagsandurot sa katungod ug hustisya bisan sa atubangan sa kawalay kasigurohan.
