Gibida ni Presidente Bongbong Marcos ang waste-to-energy venture tali sa Kanadevia Corporation sa Japan ug sa Philippine Ecology Systems Corp.
Nunot kini sa iyang state visit sa Japan niadtong Hunyo 19 kutob 22.
Tumong sa joint venture ang tinguha nga masulbad ang suliran sa basura aron mahimong limpyo nga enerhiya.
Kini nga proyekto gilauman nga makatabang sa solid waste management sa Metro Manila, gawas pa sa pagbukas sa dugang trabaho aron ma-implementar ang programa sa lokal nga komunidad.
Gisugilon usab ni Marcos nga ang Pilipinas, nakakuhag kontrata sa Tsuneishi Group, kinsa usa ka dako nga kompanya sa shipbuilding sa Japan, aron magtukod sa “world class” methanol dual-fueled KAMSARMAX bulk carrier sa Cebu.
Ang maong proyekto magbukas gihapon sa daghang oportunidad sa trabaho, dungan sa pagsaka sa papel sa Pilipinas isip lider sa green shipping technology sa kadagatan.
Gawas sa pakigkita sa business sector, iya usab nahimamat ang mga lider sa Japan Aerospace Exploration Agency (JAXA) aron hisgutan ang kooperasyon sa teknolohiya sa airspace, ilabi na sa disaster monitoring, suporta sa mga mag-uuma, ug kaluwasan sa komunidad.
Siya miingon nga ang paggamit sa satellite data ug geospatial technology gilauman nga makatabang sa pag-andam sa pagresponde sa mga katalagman, ilabi na sa mga lugar nga kasagaran maigo sa bagyo.
Sa sektor sa turismo, nakigkita si Marcos sa mga opisyal sa Japanese tourism industry aron mapalambo ang inbound travel padulong sa Pilipinas ug mapadaghan ang oportunidad sa mga Filipino workers sa sektor sa hospitality ug travel.
Sa kataposan sa iyang biyahe, gipasalamatan ni Marcos ang Filipino community sa Osaka sa ilang kontribusyon sa ekonomiya ug sa maayong imahe sa Pilipinas sa gawas sa nasud.
Namahayag ang pangulo nga ang paningkamot sa mga OFWs sa Japan, nagsilbing dakong inspirasyon sa gobyerno sa pagtukod sa sa Bagong Pilipinas nga puno sa trabaho, oportunidad, ug kalambuan.
